[179] EPISTOLA LXXIX.

Clariss. Vir.

D. SUFFRIDO PETRO,

I. U. Licentiato, & Collegii Jurisconsultorum, quod Coronarum vocant Praefecto, Domino & Amico suo colendo.

IANUS GULIELMUS.

S. P. D.

Primum ita ut debeo ingentes tibi gratias & ago & habeo, SUFFRIDE, pro benevolentia in me tua, officiis & plurimis & maximis tot annos testata, cui quidem beneficentiae ego si parum respondi, adolescentiae veniam dabis, minus ad haec •των καθηκοντων• attentae, respondebo certe vergente jam ad maturitatem virilem aetate, ita ut amicissimi tibi & gratissimi hominis munus implevisse me & tibi SUFFRIDE, & bonis omnibus probem. De Collegii nostri Curatoribus correxisse spero tuam sedulitatem, quod mea negligentia minus fecit, ut iis & generatim omnibus & seorsim singulis, gratias agerem & animum meum cum Reip. isti tum inprimis Academiae devinctum pollicerer: verum hoc curasse te scio, qua diligentia es, & in hujusmodi officiis frequentandis dexteritate. Ad iter meum abeo, quod Francofurtum usque secundum & facile habui, ubi DONELLI, quae vidi tibi emi, & Cosvino Cholino tradidi, eum recte curasse spero; scribere in tumultu nundinarum & occupationibus multis urgentibus, neque libuit, neque licuit. Francofurto Lutetiam cum NIVELLIO & PUISAEIS fratribus perrexi ipsis Kal. Aprilibus, & nono die perveni: caetera salvus & alacer, verum equo ea festinatione amisso & Meti sepulto, de quo ibidem querelam ad te longis versibus contexui, quam non misi, quod certi homines nulli occurrerent. Lutetiae CUIACIUM inveni, sed ad iter Bituricense accinctum; Is & tua commendatione & meis •πιθανοις• quae legerat & probarat, valde mihi bene velle visus est, gratificandi in iis, quae cupiebam, facultatem ademit bibliotheca procul hinc posita & ipsius discessus post paucos dies, quam huc appuli, si in Biturigas venirem pollicitus est officia omnia, de quo videro sub hyemem. Omnino quotquot hic docti sunt, humanissime & cupidissime me complexi sunt, complectunturque cottidie plures, neque mihi dubium, quin omnia ab ipsis impetraturus sim sane facile, sed perincommode accidit ut longe hinc absint Burdigalae Cl. PUTEANUS & P. PYTHAEUS, uterque a libris Mss. in M. Tullio copiosus: verum & illos sub autumnum expectamus, & interim ex Bibliotheca S. Victoris monachus eruditus orationum volumen vetustatis mediocris mihi commodabit. Plane hic libenter sum, & ut spero, cum fructu studiorum & laude aliqua mea, una annona mihi molesta, quae impensissime excanduit, nam pro victu expendo, menstruos coronatos octo, accedunt huc contagia quaedam pestis, quae e Bituricensibus & Aurelianensibus huc usque permanare dicuntur, etiam rumusculi in aula audiuntur regem de Belgio Galliae conjungendo cogitationem seriam suscipere. Polliceri in eam rem Lotharingum Alansonio & opes principatus sui & filiae nubilis matrimonium. Verum haec hujusmodi cum regem cogito, admittere ad animum non possum. Vestrae Reip. qui status sit animi pendeo, de quo quod commodo tuo fiat ad me perscribe. Gallicana auxilia quae dicebantur ad Truchesium mitti, vidi huc iter faciens, peditum ad tria millia, equites plus minus quingentos. Vos urbanos extra belli aleam fore spero, & tamen cum minas multorum audio, pertimesco. Plura non licet, ita proderat is, cui daturus eram: itaque excusabis me Cll. Vv. Io. METELLO, IAC. CAMPIO, LUD. HELLERO, GOD. STEEWECHIO, ad quos cum scribere cuperem excludebar tempore, sed mittam literas rebus meis plane constitutis ad omnes. Ad IACOBUM CAMPIUM vero carmen, quod debere me memini. Interim benevolentiae in eos meae significationem & plenam amoris veri memoriam tu testabere. Bene vale, amicissime SUFFRIDE, & me ama, hactenus si mutuum a me fieri experiere. Salutem praeter eos quos posui, asscribo convictoribus tuis & familiae, nominatim G. BRUNI •διλολογωνε και διλιλερμιω• populari meo BRECUALDO, tum M. HAIONI, G. VELTMANNO, N. CLODIO, caeteris, qui mihi volunt cupiuntque omnibus. Vale iterum. Lutetiae Parisiorum. An. MDXXCII. Idibus Majis anni Gregoriani. Hem! Quod pene exciderat negligentia vere lata, ut ICti. loquuntur, de ruo manuscripto ad FRANC. MODIUM Francofurto scripsi ad te quam primum mitteret, aut quando missurus esset significaret, quid fecerit aut non fecerit scribe, ut cunctantem tempori incitare possim. Si HIER. BERCHEMIUS istic erit habes, cujus auctoritate ille vel moveatur magis, vel etiam cogi possit, quem officiose saluto, sed retro ad Comitem suum rediisse cum hae tibi dabuntur suspicabar.